Carry Trade捲土重來

貝南奇認為美國借貸市場崩潰對樓價及個人財富影響係長期性嘅，政府將利率降至0.25厘及計劃購入1.25萬億美元按揭係有紓緩作用，但無法改變大方向。美國去年第四季不履行按揭率上升7.88%，係1972年來最高。去年樓價回落8.2％，加上股市回落令美國人財富減少11.2萬億美元。各位唔好期望牛市會喺2009年，甚至2010年上半年出現牛市（即美股50天移動平均線高於200天線機會唔高），但唔代表冇錢搵，例如去年11月同12月嘅反彈及今年3月同4月嘅急速反彈。由去年10月開始之後嘅十八至二十四個月，股票市場內充滿Double Your money嘅機會。各位可在每次上落市中賺取100％或以上利潤。

呢次反彈市中，金融股升幅十分了不起，例如美國銀行、富國銀行、UBS、滙控（005）等由3月9日至今平均升幅達120%（滙控升幅仍大大落後其他銀行股）。金錢遊戲嘅規則進入「Picking the right stocks and knowing when to sell」期。Trading已取代投資，成為主流。

G20國峰會之後，各國相繼出台新一輪經濟刺激方案，其中又以日本及中國最受矚目。日本嘅方案推出後，日經平均指數卻回落；反之，中國人民幣國際化已邁出重要一步，與中國貿易今後可以人民幣結算。依家中國已同亞洲、歐洲、南美、東南亞等國家簽署咗6500億人民幣互換協定，中國向呢D國家輸出人民幣，作為日後支付畀中國貿易之用。

家吓中國已係全球第一大外滙儲備國、第二大出口國、第三大經濟實體。人民幣國際化分「三步走」：一、實現人民幣作為國際計價結算、各國外滙儲備及在外滙市場交易。二、令中國外滙儲備增長放緩，未來中國出口以美元計價減少，以人民幣結算上升，令人民幣喺世界範圍內流通。三、境外人民幣債權、債務問題，除人民幣在境外流通量增加外，亦形成人民幣境外借貸市場。美國《政治周報》網站認為，一場世界經濟大戰已經開始，對手係中、美兩國，目標係爭奪世界經濟嘅主導權。

依家美國仍係世界最大經濟實體，喺金融海嘯後實力受嚴重削弱，霸主地位已岌岌可危；反之，中國則趁機鞏固自己正在崛起嘅經濟實體地位，成為金融海嘯中最大贏家。最近中國就手上1萬億美元美國國債係咪安全提出質疑，已動搖咗美元地位，美國總統奧巴馬立即出面捍衞美元滙價……誰主導、誰被動？已十分清晰。

近期投資界恢復Carry Trade，令巴西、匈牙利、印尼、南非、紐元及澳元由3月20日至4月10日呢段期間兌日圓上升8％或以上，為1999年以來最大升幅。高盛證券、Insight Investment Management、Fischer Francis Trees & Watts等大行，恢復向客戶分析Carry Trade，令資金回流新興市場及商品市場。借日圓、借美元（同業拆息只有1.13厘）買巴西雷亞爾（有10.51厘息）如滙價不變，實賺9.38厘。過去三十年（1980年至今）Carry Trade每年平均回報達21％，只係喺2008年下半年至今Carry Trade投資者才損失慘重，2009年3月份起Carry Trade又漸漸恢復吸引力。

美股VIX自去年11月開始一直回落，在今年首季形成下降三角形，即短期展望美股仍有上升力量。4月份FASB決定美國金融股資產負債表可Mark to Model，令銀行股响4月份大升。G20峰會後股市進一步上升，但2007至08年美股共失去11萬億美元市值（超過50%市值），奧巴馬上台後再回落20%，上述客觀形勢好容易孕育熊市反彈。

2008年3月17日金價見1023.5美元後出現七個月調整，跌幅32%，最低為2008年10月24日嘅682.41美元，主要拋售來自對沖基金，佢地擔心嚴重經濟衰退可能引發通縮……。2008年10月後因投資者對全球金融系統失去信心，喺flight to quality 驅使下，金價响今年2月20日再見1006.29美元，短短四個月升幅達47%。隨住各國政府刺激經濟計劃出台，投資者信心重建，黃金一度跌140美元（或14%）。技術上睇，金價250天線（856美元）有支持，如能守穩，後市金價可再次睇好。Jeff Clark建議每次金價喺870美元以下、823美元之上都係吸納水平。喺現今客觀環境，小量持有實金有一定需要。金融危機2007年11月開始，2008年10月達最高潮；其後各國政府出手努力挽救（或修補）金融海嘯造成嘅災害，包括利用財政政策及金融政策對抗環球衰退，形成各國政府負債佔當地GDP比率大升。短期而言似乎已成功阻止通縮惡化，但無法令經濟恢復高增長。因為2007至08年全球投資者失去大量財富；個別投資者响呢場金融海嘯中虧損約40%財富，而令銀行失去20%借貸能力（因美國樓價回落30%）。因此估計呢次衰退期唔會短，各位唔好忘記道指或恒指由1997年至今過去十多年回報率係「零」（或負增長）；反之過去十年金價升幅卻不俗。龜兔競走，最後贏家係龜唔係兔！